OE-CUSSE RCL Vox Populy 16/08/2023 = Conselho de Imprensa de Timor-Leste (CI-TL) hamutuk ho Australian Broadcasting Corporation Dezenvolvimentu Internasionál ABCID , konklui ona formasaun kona-bá reportajen investigativu nian , no atribui ona Sertifikadu bá jornalista timoroan na’in-24, iha Salaun Madre Dominicana, Santa Rosa, Aldeia Oebau, Suku Costa, Sub-Rejiaun Pante Makasar, Rejiaun Autonomu Enclave Oekuse Ambeno Kuarta 16/08/2023.
Formasaun ne’e hala’o durante loron tolu (14 to’o 16 Agostu 2023) ho tema “Journalism Fundamentals Training”, liu-liu atu hametin jornalista sira-nia kompeténsia iha kontestu kobertura no publikasaun notísia.
Atribuisaun sertifikadu bá jornalista sira hosi Prezidente CI, Otélio Ote, fasilitadór na’in-rua hosi ABCID Australia nian, Michael Coggan ho Caroline Winter inklui prezensa mós hosi Prezidente Autoridade RAEOA, Arsénio Paixão Bano.
Reprezentante hosi ABC-ID, Fasilitadór Michale hasksolok tebes ho formasaun ne’e tanba bele fahe esperiénsia bá jornalista Timoroan sira no agradese liu tán, tanba serimónia ne’e marka prezensa direta hosi Governante ne’ebé mak bemvinda ona sira iha Oecusse.
‘’Sorumtu sira hanesan ne’e, sai parte ida previléjiu tebes, hodi servisu ho jornalista sira iha Timor-Leste, tanba país Rua ne’e iha istória ne’ebé naruk tebes, entre jornalista Australiana ho Jornalista Timoroan sira. Liuhosi ita fa’an ita-nia matenek no koñesimentu ida-ne’e , sei ajuda jornalista hosi rai rua atu sai di’ak liu tán, sai ema ne’ebé ho koñesimentu di’ak iha futuru,” hateten Fasilitadór ABCID Michale.
Prezidente Conselu Imprensa Timor Leste (CI-TL) , Otélio Ote hateten, formasaun ida-ne’e CI servisu hamutuk ho ABCID bá faze da-ruak nian. Iha faze dahuluk, CI hala’o ona iha Díli, iha fulan hirak liu bá. Jornalista sira barak mak partisipa hotu ona iha formasaun liu bá.
‘’Iha faze ida-ne’e, CI hakarak hili fatin Oecusse tanba atu introdús bá jornalista sira katak, Oecusse mak ida-ne’e. Segundu, atu fó tempu bá jornalista sira oinsá mak partisipa iha formasaun ne’e ho sériu. CI programadu katak bá oin sei iha tán formnasaun sira tuir mai, presiza lori Timor bá munisipiu sira. Formasaun ida-ne’e hanesan parte ida hosi CI nia mandatu. Hanesan saida mak jornalista sira hatene ona, CI hanesan órgaun ida ne’ebé independente iha aspetu administrasaun no finansas , Maibé, ida ne’ebé importante tebtebes maka eleva kapasidade tékniku, jornalista sira, kapasidade profesionál no kapasidade intelektuál. Kapasidade profisionál no intelektuál maka halo formasaun,” Otélio Ote hateten.
Nia mós konsidera katak, jornalista sira ne’e la’ós foin partisipa iha formasaun sira hanesan ne’e, maibé dala-barak ona partisipa iha formasaun oioin. Tánbá ne’e nia fiar katak formasaun sira ne’e lori aumentu duni koñesimentu bá jornalista sira.
Ote husu bá Jornalista sira , tenke kadi bebe`ik kakutak hodi akompaña nafatin situasaun sira ohin loron nian, liu-liu kona-bá movimentu ema ka sosiedade, tanba baibain ema sempre hateten buat hotu ne’ebé akontese kada loron, sei la sees hosi notísia.
‘’Sosiedade ohin loron ninia kapasidade atu entende kona-bá jornalizmu maka’as loos. Bainhira jornalista sira la hakat pasu ida liu sira maka sosiedade bele husik hela jornalista iha kotuk, tanba de’it prezensa média dizitál sosiál. Plataforma ida-ne’e, perigu tebes bá profisaun jornalista , dala-ruma, ita atraza, sira mak lalais liu. Dala-ruma ita-nia publikasaun sira la konsege hanesan sosiedade ne’ebé la tuir formasaun jornalista. Ne’ebé, ita koko atu ita tama. Ne’e mak, investigasaun jornalizmu ne’e koko atu ita kadi ita-nia matenek di’ak liután komunidade média sosiál sira,” Dehan Prezidente CI-TL Otélio Ote.
Matéria ne’ebé jornalista sira hetan durante formasaun loron tolu ne’e mak hanesan, reportájen justu, akurásia no balansu. Étika jornalizmu, hakerek istória ka notísia pro-ativu no reativu, prátika hakerek istória orijinál, oinsá peskiza dadus, verifika faktu sira, estrutura no estilu entrevista. La’ós ne’e de’it, aprende mós kona-bá foti vídeo ne’ebé di’ak ho foto jornalizmu
Fasilitadór sira iha formasaun ne’e reprezenta hosi ABC Austrália, Michael ho Caroline no Conselho de Imprénsa (CI) Timor-Leste, reprezenta hosi Diretór Diresaun Dezenvolvimentu Análiza Média (DDAM), Alberico da Costa Junior.
Jornalista: Nasci Mento
Editor ; NP
