Lospalos RCL VOX POPULY 05/11/2022 = Jerasaun Dòze de Novembru 1991 ga J-12 de Novembru 1991 iha Lautèm Sabadu Finda Semana ne`e 05/11/2022 Organiza Konferènsia dahuluk ba J-12 de Novembru rihun Ida Atus Sia , Sia nolu resin Ida iha Municipiu Lautèm , iha Salaun Administrasaun Municipiu Lautèm ho tema Ran Turuk Loriku A`swain hamutuk atu hametin Unidade no Dezenvolvimentu Nasional iha Municipiu Lautèm.
Prezidente Comisaun Organizadora Konferènsia dahuluk J-12 de Novembru Municipiu Lautèm , Anizu Frèitas Marques ba Jornalista RCL hateten , Konferensia ne`e realiza atu halibur hikas Jerasaun 12 de Novembru nian ne`ebe durante ne`e , lemo-lemo iha Municipiu Lautèm la koñese malu , nune`e entre sira bele kria Amizade diak no hametin Unidade no Indepedensia Nasional iha Municipiu Lautèm.
Prezidente Comisaun Organizadora ne`e mòs afirma , ho Konferènsia ida ne`e bele Kria Strutura Municipal nian ne`ebe metin hodi bele hamutuk halo buat ruma ne`ebe Pozitivu ba ba Prosesu Dezenvolvimentu Nasaun ida ne`e , liu-liu iha Municipiu Lautèm .
‘’ Durante ne`e Jerasaun 12 de Novembru nian iha Municipiu Lautèm haketak malu , ne`eduni , liu husi konferènsia ida ne`e , Atu fanu sira , atu bele Koñese malu no kria amizade no Sòlidu nafatin , halibur malu hamutuk hodi bele organiza buat ruma ne`ebe pozitivu hodi kontribui ba Prosesu Dezenvolvimentu Nasaun nian , tamba atu Kontribui ba Dezenvolvimentu Nasaun nian , la`os dependente ba Ina naman sira , maibe Juventude nia Papèl Importante , hodi bele foti asaun ida ne`ebe diak ba Nasaun nia Futuru , liu husi Konferènsia ida ne`e mòs Jersaun 12 de Novembru nian bele halibur malu no koñese malu , atu hametin Unidade Nasional , tamba durante tinan barak ona Aktividade ne`ebe Comite 12 de Novembru delega mai Municipiu , ladun oragniza malu ho diak , nune`e espera ba oin bele Organiza malu diak liu tan wainhira iha ona Strutura ne`ebe metin no Sòlidu.’’ Dehan Prezidente Comisaun Organizadora Konferènsia dahuluk iha Municipiu Lautèm , Anizu Frèitas Marques ba Jornalista RCL Sabado 05/11/2022.
Nia mòs afirma tan , Jersaun 12 de Novembru labele sai Bainaka iha nia rain rasik , maibe tengki esforsu hodi Kontribui ba Prosesu Dezenvolvimentu , hodi banati tuir ita nia Heroi sira ne`ebe sacrifika sira nia A`an ba Funu Liberta ita nia rai doben ida ne`e .
‘’ Ita Jerasaun 12 de Novembru no Juventude tomak iha Municipiu Lautèm , labele sai Bainaka iha nia rain rasik , maibe buka haka`as an atu Estuda maka`as hodi bele hetan matenek , nune`e ita hotu bele Alkansa Mehi Lutadòr sira ne`ebe Sacrifika A`an durante Luta ba rai doben ida ne`e , no banati tuir ita nia Heroi sira nia sacrifisiu hodi luta ba libertsaun Povu liu husi Dezenvolvimentu ne`ebe sustentavèl .’’ hateten nia.
Hakarak informa mos katak , Konferensia dahuluk J-12 de Novembru nian ne`e laiha suportasaun Orsamentu husi Estadu , maibe Sobrevivente 12 de Novembro hamutuk ho Comite 12 de Novembru mak halibur osan Hamutuk ho Montante rihun Rua Dolar Americanu hodi fasilita Konferensia ida ne`e.
Entretantu ;Konvidadu sira ne`ebe Marka Prezensa iha Primeiru Konferènsia J-12 de Novembru 1991 ne`e mai husi Lider Comite 12 de Novembru husi Nasional , Regional , Municipal , Sobrevivente 12 de Novembru iha Municipiu Lautèm , Tenente General Lere Anan Timor , Administrador Municipiu , no Confrensista sira ne`ebe mai husi kada Postu Administrativu iha Municipiu Lautèm kauze atus Rua liu. ACI
Jornalista ; ACI
Editor ; NP
