Oekusi RCL Vox Populy 14 /08/2023 = Konselu Imprensa (KI) de Timor Leste husi Kòperasaun Australian Broadcasting Corporation Dejenvolvimentu Internasional, (ABC-ID) Segunda feira ne`e , fasilita formasaun bá jornalista timor oan sira kona-bá ‘’Journalism Fundamentals Training”, atu hametin jornalista sira-nia kompeténsia iha kontestu kobertura no publikasaun notísia.
Diretór Diresaun Dezenvolvimentu no Análiza Mìdia (DDAM) Konselu Imprensa, Alberico da Costa Junior, liu husi Abertura treinamentu ne`e hateten , hateten eventu ne’e, la’os foin KI halo , maibé hahú iha kedas ona ho parseiru sira hosi ABC. Iha ne’ebé serimónia dahuluk realiza ona iha Postu Administrativu Balibo, loron 06 Juñu 2023), uainhira CI lansa akordu ho ABC, oinsá mak bele kontínua kooeprasaun ne’e iha área jornalizmu nian.
Alberico esplika formasaun ida-ne’e parte hosi kooperasaun, liu husi planu asaun jerál KI nian hosi 2022 to’o 2026, formasaun no kapasitasaun sira refleta ona iha ne’ebá ho objetivu, atu hametin kompeténsia téknika no kompeténsia profesionál jornalista nian.
‘’uainhira koalia kona-bá tékniku profesionál, ha’u hanoin, ida ne’e, bájiku liu, uainhira ita-bo`ot jornalista sira iha koñesimentu di’ak kona-bá hakerek, oinsá entrevista ema, oinsá sai aprezentadór ka moderadór , liu husi modera programa ruma iha televizaun, no mós iha rádiu.” Alberico Junior hateten.
Tuir Alberico iha ligasaun ho profesionál. Ne’e maka, matéria importante bá jornalista sira maka kódigu étika jornalizmu nu’udár matéria sira ne’ebé iha relasaun ho muda karáter jornalista nian.
Alberico afirma dala-barak ema dehan jornalista ne’e profesionál, maibé, saida. Saida mak nia sasukat. Dala-barak ko’alia dehan, nia ne’e jornalista puru, nia jornalista profesionál.
“Ne’e, ita-nia kode étika klaru kedas, temi iha ne’ebá. Liu-liu prinsípiu jornalizmu ne’ebé ita iha. Ne’ebé, ha’u hanoin, oras ida, iha buat barak ne’ebé kolega sira bele aproveita didi’ak, tanba kolega sira esperiénsia barak ne’ebé hosi ABC,” Alberico tenik.
Diretór Alberico fó mós hanoin bá jornalista na’in-26 partisipa iha formasaun ne’e tenke atensaun ho di’ak liu, aproveita didi’ak oportunidade, ho matéria sira mak hosi CI rasik, no mai mós hosi fasilitadór sira ABC nian.
Iha biban ne’e, fasilitadór Michael Coggan husi ABC-ID, agradese bá jornalista timor oan sira, tanba , maske husi Munisipiu ne`ebe diferenti , maibe ho pasensia bele hamutuk iha Oecusi , tan de`it hakarak aprende liután kona-bá servisu sira jornalizmu nian, liu-liu atu hasa’e kompeténsia iha kobertura no halo publikasaun bá notísia sira.
“Obrigadu, tanba, maun ho mana sira sa’e ho Roo hosi dook mai to’o iha Oekusi atu mai aprende. Ita-boot sira iha ne’e, ita hotu iha ne’e, atu aprende buat ruma. Klaru, ha’u mai iha ne’e, ho ha’u nia kolega Caroline no ami iha ne’e, atu aprende buat balu hosi ita-boot sira (jornalista). Esperu mós, ita-boot sira sei aprende fali buat balu hosi ami,” Dehan Michael.
Michael servisu ona iha ABC, bá tinan 30 resin, no nia mós servisu barak iha área televizaun nian, maibé iha mós servisu iha rádiu, no servisu barak liu iha hakerek notisia online.
“Buat ida importante atu ita hothotu hatene, ita hothotu iha ne’e, jornalista, no jornalista sira baibain di’ak la-halimar husu perguntas bá ema. Iha ne’e, espasu ida ne’ebé mak seguru bá ita-boot sira, atu husu kualker perguntas de’it,” Michael haklaken .
Fasilitadóra Caroline Winter introdús nia aan katak, besik tinan 22 ona nia servisu iha média, barak liu iha rádiu komunidade, iha estasaun televizaun sira seluk iha ABC-ID, no halo mós servisu barak iha Transmisaun nianBroadcasting.
“Hau servisu iha hamutuk ho Midia sira , liu-liu Radio Komunidade sira besik tinan 22 ,tamba Sai jornalista ne’e, hanesan previléjiu bo`ot, no onrá ida. Ne`e duni hau husu b aba kolega Jornalista timor oan sira tenke orguilu bá ita-bo`ot sira-nian aan,” Caroline hateten.
Jornalista no jestór Rádiu Komunidade Lospalos Vox Populy orguilu , tanba KI bele realiza duni treinamentu bajea ba nota entendimentu ne’ebé halo ho ABC-ID. Hodi hasa’e di’ak liután jornalista Timoroan sira-nia koñesimentu iha área jornalizmu nian, hodi fó hikas informasaun ne’ebé kredível bá lian laek sira.
Entretantu ; Formasaun ne’ebé hala’o iha Rejiaun Administrativu Espesiál Oekusi (RAEOA), durante loron-tolu, hahú Segunda-Quarta, 14-16 Agostu 2023, partisipa jornalista sira husi mídia nasionál no lokál sira hamutuk na’in-26.
Jornalista: Nascimento
Editor ; NP
