Atu hametin liután kooperasaun no parseria entre UNICEF no Gabinete Vise-Primeiru-Ministru, Sua Exelensia Eng. Mariano Assanami Sabino, Vise-Primeiru-Ministru, Ministru Koordenador Asuntu Sosial, Ministru Dezenvolvimentu Rural no Abitasaun Komunitaria Republika Demokratika Timor-Leste, no Bilal Aurang Zeb Durrani, Reprezentante País UNICEF, horiseik asina Memorandu Entendimentu (MoU). MOU koalia kona-ba apoiu UNICEF nian ba dezenvolvimentu kapitál umanu iha setór sosiál sira, inklui iha área sira Dezenvolvimentu Labarik Idade Infansia, Nutrisaun no Seguransa Ai-han, no Empoderamentu Juventude.
Asinatura MoU ne’e formaliza servisu ne’ebé hala’o hela entre UNICEF no Gabinete Vise-Primeiru-Ministru (VPM). Aleinde ne’e, MoU ne’e mós dokumenta kompromisu UNICEF nian atu apoia vizaun no objetivu sira husi Forsa Traballu Inter-Ministerial ba Asuntu Sosial (FTIMAS), ne’ebé harii iha tinan 2023, atu promove esforsu koordenasaun entre ministériu relevante sira Governu nian liuhusi halo investimentu iha Dezenvolvimentu Labarik Idade Infansia (DLII), Nutrisaun no Seguransa Ai-han no Empowermentu Juventude.
“Hodi Governu Timor-Leste nia naran, ha’u sente onra atu asina MoU ne’e entre UNICEF no ha’u-nia Gabineti nu’udar Vise-Primeiru-Ministru. MoU ida-ne’e sei tulun UNICEF atu fó asisténsia téknika no apoiu ba Forsa Traballu Inter-Ministerial ba Asuntu Sosial hodi hasoru dezafiu sira ne’ebé aas liu iha área sira ne’ebé relevante ba dezenvolvimentu kapitál umanu, hanesan Dezenvolvimentu Labarik Idade Infansia, Nutrisaun no Seguransa Ai-han, no empoderamentu ba foin-sa’e sira,” dehan S.E. Mariano Assanami Sabino. “Hau fiar katak liuhusi ita-nia esforsu kolaborativu, ita sei loke dalan ba futuru ida-ne’ebé naroman liu ba labarik sira no povu Timor-Leste.”
Iha Timor-Leste, porsentu 47 husi labarik sira ne’ebé seidauk to’o tinan lima hetan esperiénsia raes-badak, ne’ebé iha efeitu signifikativu ba tempu naruk ba sira-nia saúde fíziku no mentál, ne’ebé afeta sira-nia abilidade kognitiva no produtividade iha sira-nia moris. Entre foin-sa’e sira, ne’ebé kompostu husi besik pursentu 65 husi populasaun, nivel dezempregu ne’ebé aas no asesu limitadu ba edukasaun ho kualidade, limita sira-nia kapasidade atu hetan moris diak.
Investimentu iha aprosimasaun olistiku sira ba aprendizajen, kresimentu no dezenvolvimentu, liuliu ba labarik sira ho idade tinan 0-8, estabelese fundasaun ne’ebé loos ba sidadaun sira ne’ebé saudavel, kontente no iha abilidade atu kontribui ba dezenvolvimentu nasionál.
Servisu liuhosi departamentu oin-oin iha Gabinete VPM, UNICEF fó apoiu tékniku ba Institutu Nacional Para a Defeza do Direitu da Labarik (INDDICA), Konsellu Nasional Seguransa Ai-han, Soberansa no Nutrisaun iha Timor-Leste (CONSSANTL) no Unidade Sensor ba Kombate Raes-badak (UNMICS). MoU ne’e hateten katak kompromisu UNICEF nian atu apoia servisu ne’e, ho objetivu atu asegura katak labarik sira iha Timor-Leste saudavel, nutrisaun di’ak, aprende no seguru.
“UNICEF apresia tebes lideransa Gabinete Vise-Primeiru-Ministru nian hodi asegura hadi’ak setór sosiál sira, inklui harii foin lalais ne’e Forsa Traballu Inter-Ministerial ba Asuntu Sosial sira, ne’ebé sei apoia aprosimasaun ida-ne’ebé koordenadu ba dezenvolvimentu kapitál umanu sustentavel nasaun nian,” dehan Reprezentante País UNICEF, Bilal Aurang Zeb Durrani.
“Liu husi forsa traballu, polítika Nasional Dezenvolvimentu Labarik Idade Infansia (DLII) remata tiha ona no prontu atu lori ba Konsellu Ministrus atu hetan aprovasaun. Polítika ida-ne’e sei ajuda atu asegura asesu ne’ebé justu no fasil ba servisu DLII ho kualidade aas ne’ebé sei ajuda labarik ida-idak iha inísiu ida-ne’ebé metin iha sira-nia moris, liuliu iha loron 1 000 dahuluk.”
