Karta Komunikadu Imprénsa husi Gabinete Presidénsia Konsellu Ministrus IX Governu Konstitusionál Quarta 13/09/2023 ne`ebe Radio Komunidade Lospalos Asesu katak , Governu Lori povu Timor-Leste nia naran, hato’o ninia solidariedade profunda ba Povu no Governu Reinu Marrokus, ne’ebé sofre efeitu husi rai-nakdoko ho magnitude 6,8 ne’ebé akontese iha loron 8 fulan-setembru liubá.
Rai nakdoko ne’ebé harahun país ne’e, hamate ema besik 2.800 no hakanek ema besik 2.500. Ema rihun ba rihun lakon, no ekipa salvamentu kontinua iha terrenu hodi buka sobrevivente sira.
Rai-nakdoko ida-ne’e mortíferu liu (boot liu) iha Marrokus, husikedas rai nakdoko ne’ebé estraga sidade Agadir, iha tasi-ibun osidentál país ne’e nian, iha tinan 1960, iha ne’ebé hamate ema liu rihun 12.
Sorumutuk Konsellu Ministrus nian, loron 13 fulan-setembru, Governu aprova ona atribuisaun donativu ida ho valór dolar amerikanu milloins 2,5 ba Reinu Marrokus, hodi apoia ba esforsu sira hodi hatán ba destruisaun ne’ebé kauza husi rai-nakdoko ne’e.
Primeiru-Ministru, Kay Rala Xanana Gusmão, iha karta kondolénsia ne’ebé haruka ba Sua Majestade Rei Mohammed VI, hateten katak “ami-nia hanoin no orasaun hamutuk ho Sua Majestade, ita-nia Governu no povu Reinu Marrokus durante períodu difisil ida-ne’e” no garante katak “Timor-Leste prontu atu fornese asisténsia adisionál saida de’it ne’ebé karik presiza, no ami-nia espetativa atu serbisu hamutuk ho Governu iha loron no semana sira tuirmai”.
Portavós Governu Konstitusionál IX nian, Ministru Agio Pereira, hato’o ninia “sinseras kondolénsias ba Povu no Governu Reinu Marrokus” no felisita “ema hotu ne’ebé kontinua determinadu hodi buka sobrevivente sira no apoia ba populasaun sira ne’ebé afetada husi katástrofe ida-ne’e”.
AUTORIJA HUSI ; DNPDML SECOMS
PÚBLIKA IHA RADIO KOMUNIDADE LOSPALOS
