Primeiru-Ministru Japaun, Fumio Kishida, hato’o ninia apresiasaun ba partisipasaun Primeiru-Ministru Kay Rala Xanana Gusmão, hamutuk ho Xefe Estadu no Governu sira husi Asosiasaun Nasoins Sudeste Aziátiku (ASEAN), iha Simeira Komemorativa Aniversáriu Amizade kooperasaun entre ASEAN no Japaun ba da-50, durante sorumutuk ne’ebé hala’o iha edifísiu governamentál Nagata-cho, Chiyoda, Tókiu, iha loron 16 fulan-dezembru tinan 2023.
Fumio Kishida ko’alia liu importánsia hodi hametin lasu amizade no kooperasaun entre Japaun no ASEAN, no agradese ba Timor-Leste nia partisipasaun ativa iha simeira ASEAN-Japaun, nune’e mós iha hanoin hamutuk atu dezenvolve vizaun konjunta ida ne’ebé foun, bazeia ba prinsípiu “husi fuan ba fuan”, ho planu konkretus kooperasaun nian iha área oioin. Na’i-ulun ne’e mós subliña importánsia kolaborasaun entre Japaun no país membru sira ASEAN nian, hodi hasoru dezafiu kompleksu iha atualidade no alkansa dame no prosperidade iha rejiaun ne’e.
Xefe Governu Japonés reafirma kompromisu estratéjiku ho dezenvolvimentu ASEAN no ninia apoiu ba Timor-Leste nia adezaun plena hanesan membru ASEAN nian.
Primeiru-Ministru Xanana Gusmão agradese ba Primeiru-Ministru Kishida ba apoiu kontínuu husi Japaun iha prosesu konstrusaun Estadu Timor-Leste, ba dezenvolvimentu infraestruturas nasionál no ba Timor-Leste nia adezaun plena ba ASEAN to’o tinan 2025
Xefe Governu ne’e agradese mós ba konvite hodi partisipa iha simeira ida-ne’e, no konsidera hanesan oportunidade importante ida atu reforsa lasu kooperasaun ho Japaun no País membru sira ASEAN nian.
Akompaña Primeiru-Ministru iha sorumutuk ida-ne’e, Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, Vise-Ministra Asuntus ASEAN, Milena Maria da Costa Rangel no husi Embaixadór Timor-Leste iha Japaun, Ilídio Ximenes da Costa.
Iha loron tuirmai, 17 fulan-dezembru, Primeiru-Ministru partisipa mós iha han-kalan hamutuk ida iha Palásiu Akasaka, ne’ebé oferese husi Primeiru-Ministru Japonés ba Xefe Estadu no Governu sira ASEAN nian, iha ámbitu Simeira ASEAN-Japaun ba da-50.
Durante han-kalan ne’e, Primeiru-Ministru Xanana Gusmão iha oportunidade hodi hasoru-malu ho lider sira-seluk ASEAN nian, inklui Prezidente Indonézia, Joko Widodo, no Primeiru-Ministru Brunei Darussalam, Hassanal Bolkiah, hodi diskute kestaun rejionais no hametin lasu kooperasaun.
GPM 16/12/2023
Públikasaun : RCL VOX POPULY FM 100,9 Mhz.
