Dili 8/10/2024 Governu da Sia liu husi Sekretariu Estadu Komunikasuan Sosial ka (SEKOMS) ne’ebé tutela ba Prezidensia Konsellu Ministru, liu husi fundu subvensaun Publiku Apoiu estasaun Radio Komunidade hamutuk Sia (9), hodi sosa ekipamentu transmisaun nian nune’e bele garantia atividade intrese komun hodi transmite informasaun ba komunidade sira iha munisipiu, liu liu to’o ba iha area remotas.
Sekretariu Estadu Komunikasaun Sosial (SEKOMS), Expedito Dias Ximenes husu ba Jestor Radio Komunidade sira atu utiliza osan povu nian ho responsavelidade hodi garantia informasaun ba komunidade sira.
“Ohin atu asina ne’e osan povu nian, tanba imi ekipamentus balun seidauk di’ak balun at, balun presija aumenta, osan sira ne’e transfere ba iha imi nia konta, tenki uza didi’ak, labele ba tia atu uza lori sosa ekipamentu, imi uza lori sosa fali motor, telefoni no ba pasiar fali ne’e labele” dehan. Sekretariu Estadu Komunikasaun Sosial (SEKOMS), Expedito Dias iha salaun PCM Dili Tersa feira 8/10/2024
Diretór Jeral Administrasaun, Prezidensia Konsellu Ministru (PCM-Sigla Portuguesa), Pedro Mário Exposto Feno, Hatete iha kontratu ne’ebé selebra, Governu liu husi SEKOMS ne’ebé Tutela iha Prezidensia Konsellu Ministru apoiu orsamentu ne’e ba verba ekipamentu transmisaun nian.
“Oporunidade ida ne’e atu hare liu ba kestaun tekniku nian ba ekipamentu sira ne’ebé ita atu mellora di’ak liu tan, ita hatene katak kontratu wainhira ita selebra, ita mos tenki hatudu ita nia responsablidade, ita tenki hatudu ita nia obrigasaun, katak waihira ita kontratu iha rubriga ida ita labele halo fali alterasaun ba rubriga seluk ke lolos ne’e nia la konsta iha kontratu, ne’ebé ita hotu tenki kumpri, karik iha difikuldade ruma bele hato’o karta mai iha SEKOMS atu nune’e bele hare, tetu no desidi, ha’u hanoin ohin loron ita hala’o akordu ida ne’e ita tenki hatudu ita nia responsablidade no tekniku sira sei halo akompañamentu ba ita nia ezekusaun” Diretór Jeral Administrasaun PCM, Pedro Mário Exposto Feno, esplika.
Radio Komunidade sira ne’ebé Hetan Apoiu fundu Sosa Ekipamentu FM Transmittes mak hanesan; Radio Comunidade Cova Taroman-Suai, Radio Komunidade Maubisse Mauloko, Radio Komunidade Iliwai Manatutu, Radio Komunidade Lospalos Vox Populy, Radio Komunidade Povu Viqueque, Radio Komunidade Maliana, ne’ebé kada estasaun Radio Komunidade ida hetan montante osan hamutuk Dolar Amerikanu Rihun hat ($ 4,000.00).
Entretantu Tinan ne’e Governu liu husi SEKOMS ne’ebé Tutela iha Prezindesia Konsellu Ministru (PCM-Sigla Portuguesa) estabelese tan Radio Komunidade foun rua, estasaun ida iha Munisipiu Maliana maka Radio Komunidade Balibo Five no ida seluk iha Munisipiu Manatutu maka Radio Romunidade Laklubar ho montante osan hamutuk rihun sanulu resin nen ($ 16,000.00)
Jornalista;Erli
Editor;EL
