Konsellu Ministrus hala’o sorumutuk iha Palásiu Governu, Dili, no aprova ona projetu Rezolusaun Governu, ne’ebé aprezenta hosi Primeiru-Ministru, Kay Rala Xanana Gusmão, kona-ba atribuisaun donativu ho montante dolar amerikanu millaun 2,5 ba Reinu Marrokus, hodi apoia atu hatán ba nesesidade ne’ebé provoka husi destruisaun tanba kauza hosi rai-nakdoko ho magnitude 6,8 iha nasaun ne’e iha loron-sesta kalan, loron 8 fulan-setembru, ne’ebé halo ema mate 2.800 no kanek 2.500.
Konsellu Ministrus aprova projetu Rezolusaun Governu lima, ne’ebé aprezenta husi Ministru Petróleu no Rekursus Minerais, Francisco da Costa Monteiro, ba nomeasoins:
Rui Maria Alves Soares, ba kargu Prezidente Konsellu Administrasaun nian maka Prezidente Komisaun Ezekutiva TIMOR GAP, E.P. – Timor Gás & Petróleu, E.P (“TIMOR GAP”), ba mandatu ida ho durasaun tinan haat.
Hanesan empreza públika referénsia nian iha setór enerjétiku, TIMOR GAP hetan mandatu hodi jere investimentu sira Estadu nian iha setór petrolíferu no setór relevante sira, tuir polítika ne’ebé define ona husi Governu.
José Manuel Gonçalves, ba kargu Prezidente Konsellu Administrasaun no, ho inerénsia, Prezidente Komisaun Ezekutiva Murak Rai Timor, E.P., ba mandatu foun ida ho durasaun tinan haat.
Murak Rai Timor, EP., hanesan Empreza Públika referénsia nian iha setor mineiru Timor-Leste, Murak Rai Timor, EP ne’e hetan mandatu atu atua iha interese Estadu nian iha setór refere, liuliu liuhusi realizasaun Atividade Minerál sira, tuir polítika ne’ebé define ona husi Governu.
Gualdino do Carmo da Silva, ba kargu Prezidente Konsellu Diretivu Autoridade Nasionál Petróleu, I.P. (ANP), ba mandatu foun ida ho durasaun tinan haat.
ANP nu’udar institutu públiku ho atribuisaun sira atu atua hanesan entidade reguladora setór no indústria sira petróleu, gás naturál no derivadu no setór relevante sira.
Rafael Danilson Magno de Araújo, ba kargu Prezidente Konsellu Diretivu Autoridade Nasionál Minerais, I.P. (ANM), ba mandatu tinan haat.
ANM hanesan institutu públiku ida ne’ebé ho ninia atribuisaun, atu atua hanesan instituisaun reguladora ba setór rekursus minerais ho kumprimentu ne’ebé rigorozu ba dispozisaun ne’ebé prevee ona iha Kódigu Mineiru, iha kualkér lejizlasaun ka regulamentasaun ezistente ka futura ne’ebé regula setór rekursus minerais.
Job Brites dos Santos, ba kargu Prezidente Konsellu Diretivu Institutu Jeosiénsias Timor-Leste, I. P. (IGTL – sigla iha lian portugés), ba mandatu tinan haat.
IGTL nu’udár institutu públiku ida ho ninia misaun atu poténsia kriasaun no jestaun arkivu, produsaun, jestaun, armazenamentu no difuzaun informasaun jeolójika, inklui kona-ba rekursu petrolíferu, gás naturál no mineirais, sai hanesan baze serbisu prospesaun, peskiza no esplorasaun rekursus minerais nasionál.
Nomeasaun ba Rui Maria Alves Soares, José Manuel Gonçalves, Gualdino do Carmo da Silva, Rafael Danilson Magno de Araújo no Job Brites dos Santos, tau iha konsiderasaun ne’ebé rekoñese ona ba sira-nia idoneidade, integridade, formasaun akadémika no profisionál, esperiénsia ba kargu superiór sira, kapasidade téknika iha jestaun ba setór espesífiku petróleu, gás no rekursus minerais, koñesimentu polítika no estratéjika ne’ebé relasiona ho setór sira-ne’e, aleinde kompeténsia lideransa, kolaborasaun, pedagojia no motivasaun ekipa sira. Karakterístika sira ne’ebé hatudu esensiál ba dezempeñu sira-nia kargu iha entidade ida-ne’e (TIMOR GAP, E.P., Murak Rai Timor, E.P., ANP, ANM no IGTL), iha kuadru servisu interese públiku ne’ebé organizasaun sira ne’e dezempeña ba servisu Estadu.
Konsellu Ministrus delibera hodi aprova, ho kondisaun sira ne’ebé atu determina, sedénsia (fó) edifísius kuarteiraun Palásiu Governu nian hodi Parlamentu Nasionál uza, ne’ebé daudaun ne’e mamuk no la uza, haree ba espasu edifísiu Parlamentu Nasionál nian no ninia aneksu sira, ne’ebé insufisiente tebes hodi hatán ba nesesidade sira órgaun ida-ne’e nian, ne’ebé tanba aumentu hosi nesesidade servisus, nune’e mós alterasaun ba ninia estrutura orgánika, presiza aumentu ida ne’ebé signifikativu hosi númeru funsionárius, ajentes no kolaboradór sira ba ninia servisu.
Konsellu Ministrus aprova projetu Rezolusaun Governu nian, ne’ebé aprezenta hosi Ministru Administrasaun Estatál, Tomas do Rosário Cabral, hodi halo manutensaun ba interese públiku kontratuál Estadu nian iha ezekusaun kontratu públiku ho ref.ª ICB/036/MAE-2020, ne’ebé asina ona iha loron 16 fulan-fevereiru tinan 2022, ba fornesimentu ekipamentus rekolla rezíduus solidus nian no ekipamentus ba operasaun aterru kontroladu, iha ámbitu projetu jestaun rezíduus solidus urbanus nian iha Dili.
Ho diploma ida-ne’e, Governu reafirma ninia kompromisu ho implementasaun Estratéjia Investimentu ba Jestaun Rezíduus Sólidus Urbanus nian iha Dili, hetan ona aprovasaun hosi Rezolusaun Governu n. 32/2016, loron 5 fulan-outubru. Ne’e rekoñese katak iha interese públiku ba akizisaun rápida ekipamentu sira ne’ebé temi ona hodi implementa Estratéjia ne’e.
Governu deklara inválidu ba deklarasaun kona-ba interese kontratuál Estadu nian ne’ebé lakon relasiona ho kontratu públiku ho referénsia ICB/036/MAE-2023, tanba falta avizu hosi parte adjudikatória no laiha aplikasaun ba sansaun pekuniária ne’ebé prevee iha kondisoins jerais kontratu nian antes ninia rezolusaun. Aleinde ne’e, afirma kontinuasaun interese kontratuál Estadu nian iha kontratu públiku ho referénsia ICB/036/MAE-2023.
Rekoñese katak prorrogasaun ba prazu vijénsia kontratu públiku ho referénsia ICB/036/MAE-2023 no alterasaun espesífikasaun téknika ba sasán balu ne’ebé sei fornese kontribui ba interesse públiku
Governu fó instrusaun ba Komisaun Nasionál Aprovizionamentu hodi halo alterasaun ba kontratu n.ICB/036/MAE-2023 hodi permite prorrogasaun ba ninia vijénsia to’o loron 29 fulan-fevereiru tinan 2024 no alterasaun ba espesifikasaun téknika ba sasán ne’ebé sei fornese, uainhira la afeta ba operasionalidade ekipamentu rekolla rezúduu sólidu no operasaun aterru nian.
Ikus, Ministru Administrasaun Estatál hetan instrusaun hodi asina alterasaun ba kontratu n.ICB/036/MAE-2023, hafoin prorrogasaun ba prazu validade nian no garantia ezekusaun kontratu to’o loron 29 fulan-fevereiru tinan 2024.
Ikusliu, Konsellu Ministrus delibera aprova, tuir projetu ne’ebé aprezenta husi Primeiru-Ministru, Kay Rala Xanana Gusmão, kona-ba naran sira hanesan: Sergio de Jesus Fernandes da Costa Hornai no Rui Pereira dos Santos, ne’ebé sei propoin ba Parlamentu Nasionál ba kargu Komisáriu Komisaun Anti-Korrupsaun, hetan aprovasaun.
Tuir lejizlasaun ne’ebé vigora, naran sira ne’ebé propoin husi Governu agora sei analiza no vota husi Parlamentu Nasionál, no sira-nia dezignasaun sei presiza maioria absoluta husi deputadu ne’ebé marka prezensa, pelumenus katoluk haat (3/4) husi deputadu sira ne’ebé daudaun ne’e funsaun efetiva hela.
AUTORIJA HUSI ; DNPDML SECOMS
PÚBLIKA IHA RADIO KOMUNIDADE LOSPALOS
