Dili Tersa . 17 outubru 2023 = Ministru Prezidénsia Konsellu Ministrus, Agio Pereira, hanesan Ministru Koordenadór Asuntus Ekonómikus ein ezersísiu, ohin, asina ona akordu lima ho empreza importadora ai-han nian sira, hodi implementa intervensaun temporária ba estabilizasaun folin foos iha merkadu, iha serimónia ida ne’ebé hala’o iha Palásiu Governu, Dili.
Akordu hirak ne’ebé ohin selebra ona, ninia objetivu mak atu asegura presu foos importadu, ne’ebé fa’an iha armazein empreza nasionál nian sira ne’ebé fa’an kuantidade boot, hodi fiksa ho montante másimu dolar amerikanu US$ 12 ba kada saku ka parsela 25 Kg, atu permite fa’an-rahun foos ho folin másimu US$ 0,50 kada kilograma.
Hodi kumpre limite presu másimu ida-ne’e, empreza nasionál sira ne’ebé fa’an foos ho kuantidade boot ka operadór ekonómiku nasionál sira ne’ebé importa foos ho kuantidade boot sei simu subsídiu ho valór dolar amerikanu US$ 5 kada saku ka parsela 25 Kg, ne’ebé korresponde ho sentavu 20 ba kada kilograma foos nian.
Atu hetan subsídiu, empreza tenke submete pedidu pagamentu, akompaña ho kópia ne’ebé hetan autentikasaun hosi Autoridade Aduaneira, ne’ebé komprova katak importasaun produtu tuir espesifikasaun no períodu ne’ebé define ona iha Dekretu-Lei n. 76/2023, loron 29 fulan-setembru, ne’ebé estabelese medida ida-ne’e.
Empreza lima ne’ebé ohin formaliza ona akordu ho Governu maka, Perissos Victoria Lda., Loja Creative Furak Lda., Lisun Importação no Exportação Lda., Jusibel Unipessoal Lda no Alfa Dili Unipessoal Lda.
Fontes ; DNPDML SECOMS
