Iha sesta-feira, loron 4 fulan-agostu, Ministru Prezidénsia Konsellu Ministrus, Agio Pereira, simu iha Palásiu Governu, Dili, Enkarregada Negósius Embaixada Austrália nian iha Timor-Leste, Caitlin Wilson, hodi diskute kona-ba kooperasaun bilaterál ne’ebé aliña ho prioridades Governu Konstitusionál IX nian.
Durante sorumutuk, diplomata ne’e felisita Ministru Agio ba ninia nomeasaun foun daudaun ne’e hanesan Ministru Prezidénsia Konsellu Ministrus no hatudu vontade Austrália nian hodi apoiu Governu IX atu konkretiza ninia prioridades no hametin liután relasaun bilaterál durante mandatu.
Agio Pereira hateten relasaun di’ak tebes ne’ebé iha ho Governu Australianu, hanoin ba Anthony Albanese hanesan belun di’ak Timor-Leste nian ida, husi kedas tempu luta ba libertasaun nasionál.
Ministru Prezidénsia Konsellu Ministrus aprezenta prioridade prinsipál sira Programa Governu Konstitusionál IX nian, ho foku liu ba fortalesimentu ekonomia nasionál, dezenvolvimentu Greater Sunrise no Kosta Sul país nian, kriasaun empregu no dezenvolvimentu setór privadu, kriasaun Banku Dezenvolvimentu Timor-Leste hodi fasilita asesu ba finansiamentu ho taxa jurus ne’ebé asesivel no dezenvolvimentu ba setór agrikultura no indústria.
Desentralizasaun Administrasaun Públika hodi hametin partisipasaun demokrátika no dezenvolvimentu ekonómiku iha nivel munisipál no rurál mós sai atensaun, nune’e mós reforma estatutu Rejiaun Administrativa Espesiál Oekusi Ambenu no reforma no modernizasaun Administrasaun Públika ho objetivu atu hadi’a ninia efikásia no efisiente, hodi garante servisus públikus ne’ebé di’ak, liuhusi hala’o auditoria no mekanizmu revizaun ne’ebé efisiénsia no efikásia ba instituisaun públika sira. Prioridade seluk ne’ebé Ezekutivu ne’e hateten mak adezaun Timor-Leste nian ba Asosiasaun Nasoins Sudeste Aziátiku (ASEAN).
Enkarregada negósius Embaixada Austrália ne’e hato’o vontade atu habelar ámbitu Programa Mobilidade Laborál nian hodi inklui área téknika no kualifikada, hanesan otelaria.
Caitlin Wilson mós informa katak sei hahú hasoru-malu ho membru Governu balun hodi halo avaliasaun tuir setoriál oinsá Austrália bele apoiu Timor-Leste, tuir prioridades Governu Konstitusionál IX nian.
FONTES ; DNPDML SECOMS
