Lospalos RCL VP 25/11/2023 = Asosiasaun Feto Lautém AFEL Munisípiu Lautèm , Segunda ne`e Komemora Loron Nasional ba Feto Timor Leste ba dala Haát nolu resin Walu (48º) ho Tema Feto Prontu Lidera , Uluk , Agora no Futuru , nune`e Mós Seminariu Kampaña Loron 16 Ativismu Kontra Violensia hasoru Feto ho Tema hamutuk Investe iha Familia hodi Prevene Violensia Hasoru Feto no Labarik.
Presidente Assosiasaun Feto Lautèm Maria Lizia De Fatima ba Abertura Seminariu Kampaña iha Sentru Kultura Lospalos hateten, Loron Nasional Feto Timor Leste ne`e lolos Selebra iha Loron 3 Fulan Novembru tinan ida ne`e , maibe Munisípiu Lautém foin mak Selebra akompaña ho Seminariu Kampaña loron Ativismu 16 Kontra Violensia hasoru Feto , tamba Feto Timor Leste , liu-liu Munisipio Lautèm iha Dever atu selebra Loron importante ne’e .
‘’Ba loron Nasional Feto ne`e, ita Akompaña ho Seminariu ba kampaña loron Ativismo sira ninian, ne`ebe momentu ne`eba sira halo kampanha kontra violensia hasoru feto no labarik ,hodi ida ne’e ita iha Nasaun Timor Leste mos ita iha dever atu selebra loron ida ne’e , hodi sai refleksaun ida mai ita atu hatutan tan informasaun kona ba Objectivu kampaña kontra violensia hasoru feto no labarik ,tamba bai-bain ita nia sosiedade sira hateten katak wainhira ita koalia asuntu feto ita nia parseiru mane sira dala ruma sira kestiona no goja oituan feto sira dehan katak tamba saida mak sempre koalia feto deit , maibe mane ne’e ema ladun tau importansia, maibe iha ne`e hau hakarak hateten de`it katak , Feto no mane tengki hamutuk hodi Prevene Violensia hasoru Feto no Labarik , hodi nune`e hamutuk hamrik hodi sai asosiasaun ida no hamutuk sai forsa ida atu bele kontribui ba dezenvolvimentu nasional nian.’’ Hateten Presidente Assosiasaun Feto Munisipio Lautèm Maria Lizia De Fatima hato’o lian Intervensaun iha Seminario25/11/2023.
Iha fatin hanesan Pontu Focal SEI Munisipiu Lautèm Leozita da Costa mos hateten, selebrasaun ida ne’e hanesan Advokasia ida hodi kontinua Espirito no hametin ba feto timor leste iha sosiedade nia laran , no kontinua ejisti hodi fo Espasu no fo Oportunidade atu feto sira bele hola parte iha prosesu dezenvolvimentu iha seitor oi-oin iha nasaun timor leste liu-liu iha Munisipio Lautèm.
‘’iha selebrasaun ida ne’e hanesan Advokasia ida hodi kontinua spirito no hametin ba feto timor leste iha sosiedade nia laran no kontinua ejisti hodi fo spasu no , atu feto sira bele hola parte iha prosesu dezenvolvimentu iha seitor oi-oin iha nasaun timor leste liu-liu iha Munisipio Lautèm,tamba iha Nasaun ida ne’e feto mos iha ona direitu atu bele asesu actividade oi-oin.hateten Leojita Da Costa
Sekretariu Munisípiu Lautém Jacinto da Costa mós hateten hateten , wainhira feto atu Lidera tenke kaer metin , Lidera ho responsabilidade, Lidera ho domin no Lidera ho matenek, lifuan tolu ne’e tenke kaer metin mak buat hotu bele lao ba oin
‘’Liu husi biban ida ne’e hau hakarak apela ba feto sira katak,feto tenke forsa hodi lidera ho responsabilidade ho domin, no matenek, nune`e bele hamutuk ho Parseiru Mane sira kontribui ba Prosesu dezenvolvimentu ba nasaun ida ne’e, tamba nasaun ida ne’e presija feto atu bele lao ba oin.Jasinto da Costa dehan mai ita
Entertantu; komemorasaun Loron Nasional Feto Timor ba dala 48 no Seminario kampanha16 Ativismo kontra Violensia hasoru Feto no Labarik ne`e lao ho diak , tamba hetan partispasaun husi feto potensial ,sosiedade sivil no Feto Polisia iha Postu Lospalos.
Jornalista ; ersi
Editor ; NP
